سکھر۔13دسمبر(اے پی پی):وزیراعظم محمد شہباز شریف آکھیے جو سڑکاں دا ڄال وچھائے بغیر ترقی و خوشحالی دا خواب شرمندہ تعبیر نی تھی سڳدا ، نواز شریف ملک اچ موٹرویز دا منڈھ ٻدھیا ، پسماندہ تے محروم علاقیں دی ترقی تے خصوصی توجہ ݙتی ویندی پئی اے ، پبلک پرائیویٹ پارٹنر شپ نال ملک اچ ترقیاتی منصوبے شروع کیتے ویسن ۔ اومنڳل کوں سکھرحیدرآباد موٹروے ایم 6 دا سنگ بنیاد رکھݨ دے موقع تے منعقدہ تقریب توں خطاب کریندے پئے ہن ۔ ایں موقع تے وفاقی وزراء مریم اورنگزیب، احسن اقبال، اسعد محمود، خورشید شاہ، امین الحق دے علاوہ وزیر اعلیٰ سندھ سید مراد علی شاہ، ارکان قومی و صوبائی اسمبلی اتےعمائدین علاقہ وی موجود ہن ۔ایندے توں پہلے وزیراعظم تختی دی گھنڈ کھلائی کرتے ایم 6 موٹروے دا سنگ بنیاد رکھیا۔ تقریب توں خطاب کریندے ہوئیں وزیراعظم آکھیے اے اللہ تعالیٰ دا فضل وکرم اے جو ساݙی مخلوط حکومت ایں اہم منصوبے دا سنگ بنیاد رکھیندی پئی اے ، ایں نال سکھر،کراچی اتے حیدرآباد سودھے پورے ملک دے عوام کوں فیدہ تھیسی تے اے منصوبہ پورا تھیوݨ نال شمال توں جنوب موٹروے مکمل تھی ویسی ۔ وزیراعظم آکھیے اے منصوبہ 30 مہینے دی گھٹ مدت اچ مکمل کیتا ویسی تے 306 کلومیٹر طویل ایں شاہراہ تے 307 ارب روپے دی لاڳت آسی جیں اچ حکومت صرف 9 ارب روپے جݙاں جو باقی فنڈنجی شعبہ ݙیسی جیڑھا جو ایں شاہراہ دی تکمیل تے اپݨی لاڳت پوری کرݨ دے علاوہ منافع وی کمیسی ۔وزیراعظم ہدایت کیتی جو ایں موٹروے دا اوھو معیار ہووݨا چاہیدے جیڑھے موٹروے دے باقی سیکشنز دا اے ، ایں توں گھٹ معیار قبول نہ کیتا ویسی ۔ ایں کیتے سارے متعلقہ وزراء اتے ادارے اپݨی ساریاں کوششاں کرن تے مشترکہ کوششاں نال ایں منصوبے دا معیار تے مقرر مدت اچ تکمیل کوں یقینی بݨایا ونڄے ۔وزیراعظم ملک دے باقی حصیں اچ وی پبلک پرائیویٹ پارٹنر شپ دے تحت مزید منصوبے شروع کرݨ دی ہدایت کیتی ۔ انہاں وزیراعلیٰ سندھ سید مراد علی شاہ دی طرفوں سندھ اچ پبلک پرائیویٹ پارٹنر شپ ماڈل دے ودھارے دی تعریف کیتی ۔وزیراعظم بلوچستان، پنجاب اتے ٻئے صوبیں تے حکومتاں تے وی زور ݙتا جو او ایں ماڈل کوں ودھاون کیوں جو ایں توں ترقی اتے خوشحالی دی منزل ڳھدی ونڄ سڳدی اے ۔ وزیراعظم وفاقی وزیر سید خورشید شاہ دے مطالبے تے سکھر روہڑی پل مکمل کرݨ دا وی اعلان کیتا ، ایں منصوبے دی سابق وزیراعظم نواز شریف منظوری ݙتی ہئی ۔ وزیراعظم نے وفاقی وزیر سید خورشید شاہ دی خدمات دی تعریف کریندے ہوئیں انہاں دی صحت یابی کیتے نیک تمناواں دا اظہارکیتا۔ انہاں آکھیے پاکستان اچ موٹرویز دا منڈھ نوازشریف ٻدھیا ، او ایندے معمار ہن ۔ وزیراعظم نے بلوچستان توں اپ کنٹری کنٹیکویٹی تے تکھے کم کم کرݨ دی لوڑھ تے زور ݙے تے آکھیے جو بلوچستان پاکستان دا اہم صوبہ اے اتے ایندی ترقی دے بغیر پاکستان دی ترقی نامکمل اے۔ انہاں ݙسایا جومیݙی ہدایت تے گوادر دی بندرگار کوں آپریشنل کرݨ کیتے کݨک گوادر تئیں منگوائی ویندی پئی اے کیوں جو اساں پسماندہ رہ ونڄݨ آلے علاقیں کوں ترقی ݙیوݨی اے ۔ وزیراعظم آکھیے ان لینڈفریٹ دی لاڳت ودھݨ سودھے مختلف قسم دے عذر پیش کیتے ڳئن لیکن اساں کݨک دی ساریں توں گھٹ ٻولی ݙیوݨ آلیں توں وی قیمت مزید گھٹ کراتے نہ صرف چند ارب روپے مزید بچائے بلکہ گوادر دے ذریعے کݨک منگواوݨ نال ترقی دی دوڑ اچ پچھوں رہ ونڄݨ آلے علاقیں کوں وی فیدہ تھیندا پئے کیوں جو پسماندہ علاقیں کوں ترقی دی دوڑ اچ شامل نہ کیتا تاں قائد دے پاکستان دا خواب شرمندہ تعبیر نہ تھیسی ۔ وزیراعظم واضح کیتے جو موٹرویز دے معیار تے کوئی سمجھوتہ نہ کیتا ویسی ۔ سارے متعلقہ ادارے معیاری تعمیر کوں یقینی بݨاون ۔ وزیراعظم دادو، قمبر، شہداد کوٹ سودھے سندھ دے مختلف علاقیں اچ سیلاب متاثرین کیتے بہترین کم کرݨ تے صوبائی حکومت اتے پاکستان پیپلزپارٹی دی قیادت دی تعریف کریندے ہوئیں آکھیے جو حالی وی ٻہوں سارا کم کرݨ باقی اے ۔ ایندے توں پہلے وزیراعلیٰ سندھ سید مراد علی شاہ آکھیے جو اڄ ھک تاریخی ݙینھ اے ، گزریل ساڈھے ترائے سال توں ایں منصوبے تے کم رکیا ہویا ہئی ہݨ ایم 6 تے ݙوہیں پاسوں کم ھکے ویلھے شروع تھیسی ۔ انہاں سکھر حیدرآباد نیشنل ہائی وے دی بحالی کیتے فنڈز ݙٰیوݨ تے ایم 6 دا ٹول موٹروے دے باقی سیکشنزدے مطابق مقرر کرݨ تے ملازمتاں مقامی لوکاں کوں ݙیوݨ دا وی مطالبہ کیتا ۔ انہاں سیلاب متاثرین کیتے کئی واری دورے کرݨ تے وزیراعظم دی تعریف کیتی تے آکھیے جو حالی تئیں کجھ ضلعیں اچ پاݨی کھڑے ۔وفاقی وزیر آبی وسائل سید خورشید احمد شاہ ایم 6 کوں معیشت کیتے اہم ترین منصوبہ قرار ݙیندے ہوئیں آکھیے جو ایں تے ٻہوں پہلے کم شروع تھی ونڄݨا چاہیدا ہئی ۔ انہاں آکھیے سندھ کنے 3بندرگاہواں ہن انہاں توں صحیح معنے اچ فیدہ چاوݨ کیتے موٹر ویزدا ڄال وچھاوݨ دی لوڑھ اے ۔
